Azərbaycan dünya mediasında

Şuşada “4-cü sənaye inqilabı və yeni media” başlığı altında keçirilən Qlobal Media Forumu başa çatdı. Forumun yaratdığı əks-səda isə dünya mediasında hələ də izlənilməkdədir. Bu beynəlxalq tədbirə dünyanın 50-yə yaxın ölkəsindən 250 nəfər media təmsilçisinin qatılması Qlobal Media Forumuna beynəlxalq marağın kifayət qədər yüksək olduğunu göstərdi. Cənab Prezidentimizin qeyd etdiyi kimi, dünya miqyasında diqqət çəkən belə bir tədbirin məhz Şuşa şəhərində keçirilməsinin özü də mühüm bir hadisədir. 
Dünyanın aparıcı mətbuat vasitələrinin nümayəndələrini Şuşaya dəvət etməklə Azərbaycan Qarabağ və Şərqi Zəngəzur bölgələrində müharibədən sonrakı mövcud vəziyyət haqqında obyektiv informasiyaların beynəlxalq miqyasda yayılmasına şərait yaratdı. Nüfuzlu KİV-lərin nümayəndələri Laçın yolunun başlanğıcından reportajlar yayımladı və Qarabağ ərazisində yaşayan ermənilərin heç də iddia edildiyi kimi blokada şəraitində olmadığını öz auditoriyalarına çatdırdılar. Müxtəlif ölkələrin mətbuatında və bir sıra beynəlxalq siyasi platformalarda Ermənistan tərəfindən ölkəmiz haqqında məqsədli şəkildə yayımlanan saxta məlumatlar bu Forum çərçivəsində əyani şəkildə təkzib olundu. Bütün imkanlarını ölkəmiz haqqında saxta informasiyalar yaymaqla Azərbaycanın imicinə xələl gətirməyə çalışan Ermənistan siyasətçilərinin və jurnalistlərinin yalanları növbəti dəfə tutarlı dəlillərlə ifşa olundu.
Qlobal Media Forumunun açılış mərasimində çıxış edən Prezident İlham Əliyev Vətən müharibəsi dövründə Azərbaycan mətbuatının rolunu yüksək qiymətləndirərək bildirdi ki, işğal dövründə biz hamımız, tutduğu vəzifədən asılı olmayaraq hər bir vətənpərvər azərbaycanlı bir məqsədə doğru yorulmadan gedirdi. Azərbaycan mediasının bu sahədəki fəaliyyəti ona görə qiymətlidir ki, üzləşdiyimiz problemi çatdırmaq üçün bizim birinci vasitəmiz media olmuşdur. 30 ilə yaxın bir müddət ərzində üzləşdiyimiz işğal faktı mətbuatımız tərəfindən daim diqqət mərkəzində saxlanılmışdır ki, mediamız gənc nəslə vətənpərvərlik ruhunun aşılanmasında böyük rol oynayıb.
Qlobal KİV təmsilçilərinin Azərbaycan Prezidentinə sualları ilə davam edən tədbirdə dövlətimizin başçısının verdiyi açıqlamalar Forum iştirakçılarında bölgəmizdəki yeni reallıqlar haqqında dolğun təsəvvür yaratdı. Ölkə Prezidenti bölgəmizdə təhlükəsizlik məsələləri, qlobal təhlükəsizlik məsələləri, enerji diplomatiyası, Azərbaycan–Ermənistan münasibətlərinin tənzimlənməsi, eləcə də mövqelərin yaxınlaşdırılması üçün müxtəlif formatlarda göstərilən vasitəçilik səyləri haqqında dövlətimizin mövqeyini Forum iştirakçılarının diqqətinə çatdırdı. Prezident İlham Əliyev ABŞ, Rusiya və Avropa İttifaqının sülh prosesinə verdikləri dəstəyi yüksək qiymətləndirdiyini və dövlətimizin bu proseslərdə səmimiyyətlə iştirak etdiyini vurğuladı.
Keçmiş məcburi köçkünlərin işğaldan azad olunmuş ərazilərə qayıdışı ilə bağlı verilən suallara aydınlıq gətirən cənab İlham Əliyev azad olunmuş ərazilərdə aparılan quruculuq-abadlıq işlərindən danışdı və bildirdi ki,Qarabağ və Şərqi Zəngəzur rayonları üzrə təxminən növbəti üç il ərzində 150 mindən çox insan doğma yurduna qaytarılacaq. Otuzdan çox şəhər və kəndin Baş planı təsdiqlənib. Bir çox kəndlərin təməli qoyulub. Şəhərlərin Baş planları təsdiq olunanda həmin şəhərlərdə yaşamış insanların rəyi də nəzərə alınıb. 
Azərbaycanla Avropa İttifaqı arasında münasibətlərə dair verilən sualı cavablandıran Prezident İlham Əliyev ölkəmizin Avropa üçün əhəmiyyətini səciyyələndirərək bildirdi ki, Azərbaycan Avropaya əhəmiyyətli qaz tədarükçüsünə çevrilmişdir və Avropa Komissiyasının Prezidenti Azərbaycanı etibarlı tərəfdaş adlandırır. Bizim sözsüz ki, Avropaya qaz tədarükümüzün coğrafiyası genişlənir və ilin sonuna qədər əlavə iki Avropa ölkəsi Azərbaycan qazının alıcısına çevriləcək.
Növbəti gün müxtəlif mövzularda keçirilən panel müzakirələri ilə davam edən Şuşa Qlobal Media Forumu öz işini başa çatdırdı. Forumda səslənən fikirlər Azərbaycanın apardığı beynəlxalq və regional siyasətin beynəlxalq media təmsilçiləri tərəfindən yüksək qiymətləndirildiyini bir daha göstərdi. 

Ülviyyə Ağalarova, 
Salyan rayon Heydər Əliyev Mərkəzinin əməkdaşı, YAP fəalı