Azərbaycan özünü enerji sahəsində nəhəng transformasiya prosesinin tərkib hissəsi hesab edir

Azərbaycan Prezident cənab İlham Əliyevin yürütdüyü düzgün daxili və xarici siyasət nəticəsində regionun inkişaf etmiş ölkəsinə çevrilib. Ölkəmizdə dayanıqlı, davamlı tərəqqini, insanların həyat səviyyəsinin yüksəldilməsini ehtiva edən güclü iqtisadiyyat modeli yaradılıb. Son illərdə böyük uğurlara imza atan ölkəmiz müstəqil siyasət yürütməklə beynəlxalq aləmdə kifayət qədər nüfuz qazanıb, söz sahibinə çevrilib. Qlobal iqtisadi artım hər il yüksələn enerji resurslarının mənimsənilməsi ilə təmin olunur. Genişlənən iqtisadi miqyaslar yeni enerji potensiallı əraziləri istehlak obyektlərinə çevirir. Təbii enerji sərvətlərinin geoloji mövcudluğu çağdaş zamanda strateji əhəmiyyətini artıraraq əsas siyasi güc, iqtisadi qüdrət elementlərindən biri sayılır. Enerji resurslarının məhdud olmasına baxmayaraq, hər bir ölkə enerji təhlükəsizliyi problemi ilə qarşılaşır. Elə buna görə də müasir dünyada iqtisadiyyatın yanacaq-enerji resursları ilə təchizatı və enerji effekti dövlətin inkişaf səviyyəsinin mühüm indikator göstəricilərindən biri hesab olunur. Azərbaycan Respublikası da perspektivlik baxımından karbohidrogen təyinatlı enerji resurslarının bol olduğu dünya regionları sırasındadır. 
Təkcə respublikaya mənsub Xəzər setində karbohidrogen ehtiyatlarının kommulyativ həcmi hesablamalara görə, 3-4 və hətta proqnostik baxımdan 5-7 milyard ton təşkil edir. Buraya quru ərazilərdə aşkarlanmış və perspektiv potensial ehtiyatların 1 milyard ton şərti yanacağa ekvivalent miqdarı da əlavə olunduqda ümumi toplumda orta hesabla adambaşına 1000 ton həcmində karbohidrogen resursları düşür. Bu göstərici Azərbaycana planetin 10-15 ən qüdrətli mühüm neft-qaz potensiallı ölkələri sırasında yer verir. Ötən əsrin sonlarından başlayaraq qaz ehtiyatlarının nəqlinin gücləndirilməsi və yeni bloklarda hasilat işlərinə başlanılması respublikamızın enerji siyasətinin daha da zənginləşməsinə səbəb olub və karbohidrogen resurslarının ixracı ilə bağlı strategiyaya əlavə komponentlər daxil edilib. Zəngin qaz ehtiyatlarına malik olan Azərbaycan enerji resurslarının nəqlində diversifikasiya siyasətini genişləndirərək Avropanın bir çox dövlətlərinə yanacaq ixracını artırıb. Respublikamız dünyada təchizatçı kimi mövqeyini daha da möhkəmləndirib.
Prezident cənab İlham Əliyev 31 may tarixində 28-ci Beynəlxalq Xəzər Neft və Qaz - “Caspian Oil&Gas” və 11-ci Xəzər Beynəlxalq Energetika və Yaşıl Enerji - “Caspian Power” sərgilərinin açılışında çıxışında qeyd etmişdir: “Avropa İttifaqı ilə Azərbaycanın əməkdaşlığının müsbət məqamları olduqca çoxdur və gələcək potensial da olduqca genişdir.Avropa İttifaqı ilə Azərbaycan ötən ilin iyulunda enerji sahəsində strateji tərəfdaşlığa dair Anlaşma Memorandumu imzalayıb. Memorandum uğurla icra edilir. Ölkəmiz Avropa İttifaqı ilə bərabər, Cənub Qaz Dəhlizi Məşvərət şurasının üzvüdür.Azərbaycan özünü enerji sahəsində nəhəng transformasiya prosesinin tərkib hissəsi hesab edir. Azərbaycan çalışır ki, bu məsələdə geridə qalmasın və lider, aparıcı ölkə olsun”.Azərbaycan Avropanın bir sıra ölkələri ilə uzunmüddətli enerji əməkdaşlığı aparır. Burada nəzərə almaq lazımdır ki, qazdan öncə biz dünyaya neft hasil etmişik. Düşünülmüş enerji siyasəti sayəsində biz dünya ölkələri ilə sıx əməkdaşlıq edirik. Bunun sayəsində Azərbaycan beynəlxalq arenada özünü mötəbər tərəfdaş kimi göstərmişdir.  Cənub Qaz dəhlizinin həyata keçməsi ilə Azərbaycanın enerji tarixində yeni bir səhifə açıldı. Çünki Azərbaycan neftdən savayı öz qazını satmağa başladı. Azərbaycanın qazı İtaliya, Yunanıstan, Bolqarıstanın qaz bazarı üçün mühüm əhəmiyyət daşıyır və gələcəkdə ölkəmiz ixrac həcmlərini artıracaqdır. Rusiya – Ukrayna müharibəsindən sonra Azərbaycanın Avropanın enerji tərəfdaşı kimi rolu artıb. Azərbaycanın bütün məsələlərə münasibətdə nümayiş etdirdiyi ədalətli yanaşma və strateji baxışları enerji siyasətində daha qabarıq şəkildə nəzərə çarpır. Dövlət başçısı ölkəmizin prinsipial mövqeyini dəfələrlə diqqətə çatdıraraq bildirib ki, enerji amili siyasi təzyiq vasitəsi olmamalıdır. Təsadüfi deyildir ki, ölkəmizin qatıldığı bütün transmilli layihələrdə tərəfdaşların hamısı bərabər hüquqda iştirak edir və əməkdaşlıqdan faydalanır.Zəngin təbii enerji ehtiyatlarına malik Azərbaycanın kəşfiyyat vəhasilat mərhələsində olan bir neçə yataqla bağlı çox ümidverici perspektivləri var. “Babək”, “Abşeron”, “Ümid” yataqlarının istismarı ilə  Xəzər dənizinin Azərbaycana məxsussektorundan hasil olunacaq resurslar digər ölkələrin də enerji təhlükəsizliyini təmin edəcək.

Xalidə Sadıqova,
Salyan şəhər 2 saylı uşaq bağçasının müdiri, YAP fəalı