FAZİL MUSTAFAYA SUİ-QƏSD: QORXU VƏ XAOS YARATMAĞA HESABLANIB

Ölkəmizdə növbəti dəfə məqsədyönlü şəkildə təxribat xarakterli terror aktı törədilib.

Martın 28-də axşam saatlarında Milli Məclisin deputatı Fazil Mustafa yaşadığı evin qarşısında naməlum şəxslər tərəfindən güllələnib. Deputat özünü sui-qəsdən xilas edə bilsə də, iki güllə yarası alıb. Yaralı deputat 1 saylı Kliniki Tibb Mərkəzində əməliyyat olunub, daha sonra təhlükəsizlik məqsədilə Dövlət Təhlükəsizliyi Xidmətinin xəstəxanasına aparılıb. Faktla bağlı Azərbaycan Respublikası Daxili İşlər Nazirliyində və Baş Prokurorluğunda cinayət işi qaldırılıb. Fazil Mustafaya qarşı təşkil olunan sui-qəsd şübhəsiz ki, məqsədyönlü şəkildə törədilən terror aktıdır. 

Bu terrorun arxasındakı qüvvə, belə hadisələri təşkil edən sifarişçilərin hədəfi dövlətimizə qarşı inamsızlıq, cəmiyyətimizdə qorxu, xous və qarmaqaraşıqlıq yaratmaqdır. İsraildə Azərbaycan səfirliyinin açılması, bu münasibətlə XİN rəhbəri Ceyhun Bayramovun bu ölkədə rəsmi səfəri fonunda deputata qarşı sui-qəsdin törədilməsi təsadüf ola bilməz. Lakin istər üçüncü dövlətlərin xüsusi xidmət orqanları olsun, istərsə də digər təxribatçılar- onlar öz çirkin niyyətlərini həyata keçirə bilməyəcək, öz məramlarına nail olmayacaqlar. 

Məsələ ilə bağlı Milli Məclisin deputatı, Ana Vətən Partiyasının sədri Fəzail Ağamalı Cebhe.info-ya  qeyd edib ki, baş verən terror aktının arxasında üçüncü dövlətlərə xidmət edən qüvvələr dayanır. 

“Həmkarım Fazil Mustafanın həyatına qarşı təşkil olunan sui-qəsd narahatedici hadisədir. Bildiyimiz kimi, Fazil Mustafa Azərbaycan dövlətçiliyinə və müstəqilliyinə sadiq olan, eləcə də öz dövlətinin inkişafı üçün kifayət qədər əziyyətləri olmuş şəxsdir. Həmkarımızın həyatına sui-qəsd Azərbaycanı istəməyən, ölkəmizə düşmən kəsilən, milli müstəqilliyimizi və uğurlarımızı həzm edə bilməyən, xaricdən idarə olunan məkrli qüvvələrin niyyətinin ifadəsi kimi qiymətləndirilməlidir. Onların məqsədi ölkəmizdə sabitliyi pozmaq, xoşagəlməz hadisələrə rəvac vermək və xalqın dövlətimizə olan inamına zərbə vurmaqdır. 
Lakin bu qüvvələr yanılır və heç bir arzularına nail ola bilməyəcəklər. Azərbaycan xalqı və dövlətimiz arasında möhkəm birlik, həmrəylik var, dövlətimizin atmış olduğu hər bir addım Azərbaycan xalqının iradəsinə söykənir. Hesab edirəm ki, törədilmiş terror aktı Azərbaycanın hüquq-mühafizə orqanları tərəfindən yüksək peşəkarlıqla araşdırılacaq, bu terroru törədən şəxslər tez bir zamanda müəyyənləşəcək və onlara qarşı lazımi tədbirlər görüləcək. Şükürlər olsun ki, uca tanrı həmkarımızı qorudu. Fazil Mustafaya şəfa diləyirəm və onun tezliklə aramıza yenidən qatılmasını arzu edirəm”.