Azərbaycan Bayrağı milli qürurumuzdur: Aygül Bağırova

Bayraq hər bir dövlətin əsas atributu, milli heysiyyət simvolu, müqəddəsliyin, müstəqilliyin nəfəsi, istiqlaliyyətin səsidir.Məhz bu baxımdan xalqımızın azadlığını, suverenliyini, öz istiqlalı uğrunda apardığı mübarizəni, milli kimliyini tərənnüm edən üçrəngli bayrağımız həm də milli qürurumuzdur.
 
"Bildiyiniz kimi, Azərbaycan bayrağı, bizim üçrəngli bayrağımız 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə təsdiq edilmişdir. Məhz noyabrın 9-u Azərbaycanda bundan sonra hər il Azərbaycan Dövlət Bayrağı Günü kimi qeyd olunacaqdır. Hər iki sərəncamın məhz noyabrın 17-də imzalanmasının səbəbi də çox məntiqli və aydındır. Məhz 1990-cı il noyabrın 17-də ilk dəfə olaraq Azərbaycan Xalq Cümhuriyyətinin bayrağı Azərbaycanda dövlət bayrağı kimi qaldırıldı. Ulu öndər Heydər Əliyevin rəhbərliyi altında Naxçıvan Ali Sovetinin sessiyasında Azərbaycan Xalq Cümhuriyyətinin bayrağı Naxçıvanda dövlət bayrağı kimi təsdiq edildi".
 
Prezident İlham ƏLİYEVİN
Bakıda Dövlət Bayrağı
Meydanının açılışındakı nitqindən
1 sentyabr 2010-cu il

Bəli, xalqımız noyabrın 9-nu Bayraq Günü kimi qeyd edir. Çünki müstəqil, qüdrətli Azərbaycan Respublikasının Dövlət bayrağı ilk dəfə rəsmi surətdə 1918-ci il noyabrın 9-da qəbul edilmişdir. Bunu nəzərə alaraq, o cümlədən Azərbaycan Respublikasının dövlət rəmzlərinə hörmət və ehtiramı təmin etmək məqsədilə Prezident İlham Əliyev  2009-cu il noyabrın 17-də  “Azərbaycan Respublikasının Dövlət Bayrağı Gününün təsis edilməsi haqqında” sərəncam imzalamışdır. Bu sərəncama əsasən, hər il 9 noyabr  Azərbaycan Respublikasının Dövlət Bayrağı Günü kimi qeyd edilir.
 
Tanrı son bir ildə bizə azadlıq  adlı nemətin çox böyük xoşbəxtliklərini bəxş etdi.Suverenliyimizin rəmzi, qürur və güvənc yerimiz üçrəngli bayrağımız bu gün qürurla illərdən bəri düşmən tapdağı altında qalan torpaqlarımızda dalğalanır, xalqımızın azadlıq məfkurəsinə, milli-mənəvi dəyərlərə və ümumbəşəri ideyalara sadiqliyini nümayiş etdirir. Millətimizin imzası imzalar içərisində qalib ölkə adı ilə göründü, müstəqil Azərbaycanımız bütöv dövlətlər sırasına qoşuldu, bayrağımız dünyanın ən uca qülləli bayrağı adlandırıldı,dünya ölkələrinin ən gözəl bayraq meydanına  çevrildi.Dünya ölkələri Azərbaycan bayrağının timsalında azadlıq mücadiləmizin və milli qürurumuzun ucalığına şahidlik etdilər.44 gün davam edən haqq savaşımızda mənfur düşmən bayrağı endirilərək, layiq olduğu yerə - ayaqlar altına atıldı. Yerinə müqəddəs üçrəngli bayrağımız sancılıraraq sahib olduğu, haqq etdiyi əzəli və əbədi yerində dalğalanmaq, bir daha enməmək naminə.....
Milli qürurumuz olan ücrəngli bayrağımız indi işğaldan azad edilmiş, Zəngilanda, Qubadlıda, Füzulidə, Cəbrayılda,Laçında, Kəlbəcərdə, Şuşada, Xocalıda, Xacavənddə qürurla, vüqarla dalğalanır.Vətən, torpaq uğrunda şəhid olanların bayrağa bükülərək son mənzilə yola salınmasının da mənası çox böyükdür: ən ağır faciənin, dərdin qarşısına millət başı üstündə qaldırdığı bayraqla çıxır. Milli Ordumuz şərəflə, cəsarətlə, addım-addım, kənd-kənd irəlilədikcə, müstəqilliyimizin rəmzi, müqəddəs and yerimiz olan bayrağımız o yerlərdə yenidən ucaldılır.
Vətənimizin azadlığı uğrunda şəhid olan minlərlə soydaşımızın qanına boyanan, tarixin keşməkeşli yollarından keçib gələn ay-ulduzlu, üçrəngli bayrağımız xalqımızın azadlıq mücadiləsinin, milli kimliyinin, birliyinin, şərəf və ləyaqətinin ifadəsi, hörmət və ehtiramının möhtəşəm ünvanı, qürur, güvənc yerimizdir. Bu bayrağın heç vaxt dəyişməyəcək yeri, məkanı bəllidir - xalqın ürəyi, vətən torpağının ən hündür zirvələri. Bu bayraq bir dəfə yüksəldisə, bir daha enməyəcək...
Qansa-qan, cansa-can,
Yetər ki, sən dalğalan...

Zəfərin, təntənən, cah-cəlalın 
mübarək, Azərbaycan bayrağı!

Aygül Bağırova 
YAP fəalı 
Azərbaycan Jurnalistlər birliyinin üzvü.