Tehranda Suriya məsələsi üzrə zirvə toplantısı başa çatıb - YENİLƏNİB-2

İyulun 19-u Tehranda keçirilən Astana sammitində İran, Rusiya və Türkiyə prezidentləri Suriyadakı mövcud vəziyyəti müzakirə ediblər. APA-nın Tehran bürosunun məlumatına görə, sammitdə dövlət başçıları beynəlxalq və regional hadisələri nəzərdən keçirib, Suriya böhranının sülh yolu ilə həllində Astana prosesinin aparıcı rolununu vurğulayıblar. Sammitdə 3 ölkə prezidenti terrorizmin bütün forma və təzahürlərinə qarşı mübarizədə əməkdaşlığı davam etdirmək əzmində olduqlarını bildirdilər. İran, Rusiya və Türkiyə prezidentləri Suriyanın suverenliyini və ərazi bütövlüyünü zəiflətməyə yönəlmiş separatçılara qarşı mübarizədə əzmkar olacaqlarını vurğuladılar. Onlar Suriyanın şimalındakı vəziyyəti dəyərləndirərək qeyd ediblər ki, regionda təhlükəsizlik və sabitliyə nail olmaq ancaq Suriyanın suverenliyi və ərazi bütövlüyü ilə mümkündür. Dövlət başçıları bütün terrorçu qruplaşmaları məhv etmək üçün mövcud əməkdaşlığı davam etdirmək əzmində olduqlarını bir daha vurğuladılar. Həmçinin beynəlxalq humanitar hüquqa uyğun olaraq mülki əhalinin və mülki infrastrukturun qorunmasını tələb etdilər. Sammitin sonunda yayımlanan bəyanda qeyd olunur ki, 3 ölkə humanitar vəziyyətin normallaşması üçün daha çox səy göstərməyə razılaşıb. İran, Rusiya və Türkiyə prezidentləri Suriyadakı humanitar şəraitdən və beynəlxalq hüquqa, beynəlxalq humanitar hüquqa və Birləşmiş Millətlər Təşkilatının Nizamnaməsinə zidd olan bütün birtərəfli sanksiyalardan dərin narahatlığını ifadə etdi, ayrıseçkilik tədbirlərini qəbuledilməz adlandırdılar. Sammitdə Suriya münaqişəsinin hərbi həllinin olmadığı, yalnız BMT Təhlükəsizlik Şurasının 2254 saylı qətnaməsinə uyğun olaraq BMT-nin yardımı ilə siyasi yolla həll edilə biləcəyi qeyd olunub. Astana prosesində müvafiq işçi qrupu çərçivəsində dustaqların/girovların qarşılıqlı azad edilməsi əməliyyatını davam etdirmək, qaçqın və məcburi köçkünləri geri qayıtmaq və onlara dəstək olmağın zərurəti vurğulanıb. 3 ölkənin prezidentləri sammitdə həmçinin Suriya məsələsi ilə yanaşı, birgə siyasi və iqtisadi əməkdaşlığı artırmaq üçün müxtəlif sahələrdə üçtərəfli koordinasiyanı gücləndirmək əzmində olduqlarını açıqladılar. *** 21.04 Astana prosesinin qarant ölkələrinin yeddinci iclası Tehranda öz işinə başlayıb. APA-nın Tehran bürosunun məlumatına görə, Astana prosesinin qarant ölkələrinin yeddinci iclası İran prezidenti Seyid İbrahim Rəisinin ev sahibliyi ilə Türkiyə prezidenti Rəcəb Tayyib Ərdoğan və Rusiya prezidenti Vladimir Putinin iştirakı ilə keçirilir. *** 20.12 Tehranda Astana prosesi çərçivəsində Suriya məsələsi üzrə zirvə toplantısı başlayır. APA-nın Tehran bürosunun xəbərinə görə, zirvə görüşündə Türkiyə prezidenti Rəcəb Tayyib Ərdoğan, İran prezidenti İbrahim Rəisi və Rusiya prezidenti Vladimir Putin iştirak edirlər. İran İordaniya və Misirlə müzakirələrə başlayıb Şri-Lanka prezidenti iqamətgahı ələ keçirildikdən sonra ilk sərəncamı imzalayıb Şavkat Mirziyoyev Qaraqalpaqıstanla bağlı maddələrə dəyişiklik etməyəcək